كل واحد فينا عدى عليه يوم صحي فيه الصبح ولقى المياه مقطوعة في البيت عنده.. والموضوع بيبقا صعب خاصةً إنك لسه في أول اليوم ولسه بتدوّر على بديل أو مياه متخزنة عندك أو حد قريب يمكن يكون عنده مياه.

تخيل إنه في مصر فيه ملايين ده حالهم مش الصبح بس ولا طول اليوم.. لأ ده كل يوم، ومابيبقاش السؤال “هيه المياه هتيجي إمتا؟” لأنهم ماعندهمش مصدر ثابت للمياه أو وصلات سليمة توصل مياه نظيفة.

مصر الخير بدورها كمؤسسة خيرية بتساهم في تنمية الإنسان والمجتمع في كل مجالات الحياة.. كانت شايفة إنه لازم يكون ليها دور في حل مشكلة المياه وخاصةً في المناطق البعيدة والي عندهم مشكلة المياه بتشكّل مشكلة كبيرة بالنسبة لهم.

وكان للمؤسسة تواجد بالفعل في أكتر من محافظة وقرية في مصر.. ومنهم محافظة أسيوط الي بدأت فيها بحملة “أسيوط خالية من العطش” والحمد لله قدرت توصّل 2000 وصلة مياه لـ 2000 أسرة مصرية.

أول ما وصلنا أسيوط، بدأنا بـ 9 مراكز أساسية فيها، وده كان الوضع قبل ما نبدأ.

مفيش مصدر ثابت ونضيف للمياه في القرية.. لدرجة إنه واحدة من أهل القرية قالت لنا: “كنا بنملى من الترعة.. كنا بنشرب وخلاص ما أدامناش غيرها” وأم مصرية تانية كانت بتحكيلنا عن معاناتها مع الغسيل.. “كنت أحط الغسيل ومالاقيش مياه أكمّل”، فكانت بتؤثر عليها في نظافة بيتها وأولادها كتير.

وكان فيه ناس تانية بتضطر تستلف من أقرب حد تعرفه من جيرانها مياه.. “عشان ماتقلش على حد.. كنت كل بيت أملى منه شوية”، ولكن الحمد لله بعد توصيل وصلات المياه للبيوت الوضع اختلف تماماً.

جينا بعد كده لأهل القرية مرة تانية وسألناهم على تأثير المياه في حياتهم، وكان الكلام مبشّر والناس متفائلة بالإنجاز الي شافوه بنفسهم على أرض الواقع.

“فرقت كتير معايا.. برش للعيال ولما أمسح ولما أغسل ولما أعمل كل حاجة الحمد لله.. فرقت كتير معايا المياه”.. وكمان مشكلة الغسيل والاهتمام بالنظافة الشخصية ونظافة البيت اتحلت.. “من ساعة ما حطيت الحنفية الغسيل نضف”

وده كان من ضمن كلام كتير وناس كتير مبسوطة الحمد لله.. ولسه مكمّلين في حملاتنا في صعيد مصر عشان نقدر نحقق أكتر من ده، وده بسبب تبرعاتكو الي كان ليها النصيب والفضل الأكبر في إنها تحقق لأهل القرية حلم زي ده.

وتقدر لسه تساهم معانا في حملة #بالمياه_ليها_معنى لتوفير المياه لأهل الصعيد، وبدايةً من محافظة سوهاج عن طريق توفير مصدر أساسي للمياه (آبار مياه)، وممكن كمان تشارك في شراء وصلة مياه منزلية بسيطة.

تقدر تشوف قصص نجاح أكتر من حملتنا في محافظة أسيوط عن طريق الفيديو:


موقع مصر الخير غير مسؤل عن محتوى التعليقات

إشتراك في النشرة الإخبارية