قصة النجاح اللي هنتكلم عنها المرة دي مختلفة.. قصة نجاح من جوه مؤسسة مصر الخير. بدأت بفكرة بسيطة هدفها تحقق حلم كبير لدعم وتطوير الشباب في مصر، وكبرت الفكرة لحد ما حققت نجاح كبير وإنجاز مشرّف باسم المؤسسة.
صاحبة الفكرة وقصة النجاح هي رضوى يونس.. محلل مالي في قسم الاستثمار في مؤسسة مصر الخير، وواحدة من الناس اللي بتحب تشتغل في أنشطة مختلفة وتطورر من نفسها، ومن أيام دراستها وهي بتشارك في الأنشطة الطلابية اللي بتدعم من خلالها الأفكار الجديدة وبتطور وبتبني شخصيتها من خلالها.
ومن ضمن الأفكار اللي رضوى كانت مقتنعة بيها تماماً ونفسها تؤثر بشكل كبير في المجتمع في مصر، فكرة جديدة لدعم الشباب في مصر سواء الطلاب أو حديثيي التخرج، خاصةً إننا في مصر عندنا تحدي كبير اسمه البطالة، ورضوى شافت إن فكرتها بتقدم السهل الممتنع، والفكرة المناسبة اللي ممكن تحقق نجاح كبير على أرض الواقع.
وكان الحل قايم على فكرة التعهيد أو الـOutsourcing، وده بيوفر فرص كتير لعدد كبير من الشباب إنهم يشتغلوا جوه مصر في تقديم خدمات لشركات عالمية كبيرة بره مصر، بحيث تفتح باب لمستثمرين أجانب وفي مجالات مختلفة، وتبدأ تتوسع على نطاق أكبر مش بس في القاهرة.. لأ في محافظات الصعيد ووجه بحري وحتى المحافظات الحدودية.
الفكرة بتقوم على تدريب الشباب أولاً على المهارات الأساسية اللي بيحتاجوها في الشغل حسب تخصصهم واللي بيؤهلهم للعمل في الشركات العالمية، بالإضافة لتعليمم اللغات الأجنبية المختلفة مش بس الإنجليزي.. وده عشان نوسّع أكتر من استيعاب السوق لأكتر من بلد.
كل ده كان طرف الخيط بس.. واللي كمّل الموضوع كانت مبادرة من مؤسسة مصر الخير لموظفيها من أ/ محمد عبد الرحمن (نائب العضو المنتدب لمؤسسة مصرر الخير)، واللي كان هدفها المشاركة في مسابقة البنك الدولي الأولى لمقالات الشباب في مصر واللي ليها نفس الفكرة والرسالة بالظبط.
رضوى بتقول: “لما لقيت المسابقة دي.. حسيت وقتها إن دي علامة إني لازم أبدأ أشتغل على الفكرة، عشان تشوف النور”، وبعدها بدأت تكتب مسودة بسيطة عنها،، اتطورت بعد كده لفكرة متكاملة عن الموضوع ودراسة متكاملة للواقع بعنوان “مصر من البطالة إلى العالمية”
والفكرة لاقت إعجاب كبير من لجنة التحكيم، وبالفعل وصلت للمرحلة الأخيرة من التصفيات ضمن أفضل الأفكار في المسابقة.
وفي نهاية المسابقة.. قامت لجنة التحكيم بعمل حفل تكريم خاص في يوم 17 يناير عشان تكرّم أصحاب المراكز الأولى في المسابقة، واللي كانت فيها رضوى يونس فيي المركز الرابع على مستوى الجمهورية.


موقع مصر الخير غير مسؤل عن محتوى التعليقات

إشتراك في النشرة الإخبارية