منة الله مجدي.. بدأت قصتها كواحدة من متحدي الإعاقة البصرية شايفة في نفسها حاجات كتير تقدر تقدمها وتطور نفسها فيها.
منة دخلت كلية الإعلام وتفوقت فيها.. ولما اتخرجت بدأت تهتم أكتر بالكورسات والتدريبات اللي محتاجاها عشان تدخل سوق العمل، وتقدر تنافس حتى لو فرص الشغل المتاحة محدودة أو ممكن ما تكونش مناسبة ليها.

وبعد ما خلصت الكورسات الأساسية اللي محتاجاها في تعلّم الإنجليزي ومهارات الكمبيوتر.. دخلت منحة في المجال اللي نفسها تشتغل فيه وهو خدمة العملاء، وده ضمن برنامج توظيف ذوي الإعاقة بالتعاون بين مؤسسة مصر الخير وشركة المصرية للاتصالات.
وخلال المنحة تم توفير برامج خاصة عشان تساعد منة إنها تقرأ الكلام المكتوب على الكمبيوتر بسهولة.. وقدرت تحقق نجاح كبير في التدريب واشتغلت في شركة المصرية للاتصالات في قسم خدمة العملاء.

مش بس كده.. خلال فترة قصيرة قدرت تحقق تطور كبير في أدائها وتمت ترقيتها لمنصب مسئول الموارد البشرية في الشركة.
أكيد مش منة بس اللي تقدر تحقق ده.. منة وأي حد عنده إعاقة يقدر يتعامل معاها كتحدي أو يقدر يشوف مجال يساهم فيه.
منة دايمًا بتقول: “إحنا مش أصحاب احتياجات خاصة، بالعكس إحنا ذوي مهارات خاصة، ولازم نستغلها أفضل استغلال، وبالتالي لازم نبدأ ننمي من نفسنا ونهيئ نفسنا لسوق العمل”


موقع مصر الخير غير مسؤل عن محتوى التعليقات

إشتراك في النشرة الإخبارية