حاجات كتير بنشتريها وما نقدرش نستغنى عنها.. الأكل، والشرب، واللبس، والموبايل، وحاجات تانية كتير.

على سبيل المثال.. لما بتيجي تشتري موبايل جديد بتختاره كويس وبتسأل عنه وبتتأكد إذا كان هو اللي أنت عايزُه ولا لأ.

بس للأسف ساعات كتير بنهمل في أهم حاجة في حياتنا.. اللي هي صحتنا أو بمعنى أصح هي نفسها حياتنا.

اتعرفنا قبل كده على فيروس سي، وإزاي بتتم الإصابة بيه.. والمرة دي هنتعرف على الطرق اللي بنحمي بيها نفسنا من الإصابة بفيروس سي.

– بشكل عام.. لازم تدقق في المكان اللي بتختاره سواء كان مستشفى أو عيادة وإنه مكان نضيف تماماً وبيتبّع إجراءات لمكافحة العدوى لأنه كفاءة الدكتور مش المعيار الوحيد في الاختيار.

– اتأكد وأنت في المستشفى أو العيادة إن الأدوات اللي بيستخدمها الدكتور معقمة تماماً وبتتفتح أدامك لأول مرة، وطبعاً السرنجات ماينفعش يعاد استخدامها لأنها من أهم أسباب العدوى وكذلك الحقن الطبية.

– تجنب مشاركة أدوات النظافة الشخصية بتاعتك في البيت زي فرش الأسنان مثلًا أو موس الحلاقة عشان احتمال تكون ملوثة بدم معدي.

– وأنت بتعالج جروح حد مصاب في البيت اتأكد إنك لابس الجوانتي عشان تمنع تماماً أي فرصة للمرض.

– خد بالك جداً جداً من التعامل مع أي أدوات أو أسطح ملوثة بالدم.. إوعى تتهاون أو تفرط في صحتك.

بالإضافة لكل ده.. لو أب أو أم أو حتى أخ كبير علّم أخواتك الصغيرين المعلومات دي عشان لو اتعرضوا لأي موقف بره البيت أو في المدرسة يبقوا عارفين يتصرفوا إزاي.


موقع مصر الخير غير مسؤل عن محتوى التعليقات

إشتراك في النشرة الإخبارية