المدارس المجتمعية من المشروعات الأساسية في مصر الخير واللي بتساهم في تغيير حياة أطفال وأسر كتير في مصر، وفي صعيد مصر تحديداً.. مشروع المدارس المجتمعية واللي بنعتبره من أهم مشروعات قطاع التعليم في مؤسسة مصر الخير.

طيب.. إيه هيه المدارس المجتمعية أو فصول التعليم المجتمعي؟

دي فكرة جديدة وعملية بتساهم في تعليم أولادنا في الصعيد بشكل سهل وبيقرّب لهم المسافات وبيتيح لهم الفرص يلاقوا التعليم الي نفسهم فيه، وبيساعدنا كمان نقضي على ظاهرة الأطفال المتسربين من التعليم والأطفال اللي بيشتغلوا مع أهلهم أو بتضطرهم الظروف لكده.. فالمدارس المجتمعية بتساعدهم إنهم يرجعوا تاني يكملوا تعليمهم.

هل المدارس المجتمعية معترف بيها أو بتقدم شهادة معتمدة للأطفال الي بيتخرجوا منها؟

أكيد طبعاً.. الطلاب في المدارس المجتمعية بيتعلموا نفس مناهج التعليم الأساسية، وكمان بيقدروا يخلصوا السنة الدراسية في وقت أقل لو مستوى الطالب أو وقته وظروفه بتسمح.. الطلاب في العادي في كتير من محافظات وقرى الصعيد مش بيلاقوا مدارس قريبة منهم.. وده بيصعّب المشوار عليهم أو ممكن يحرمهم تماماً من التعليم خاصةً لو بنات.. فأهلهم بيخافوا عليهم من مخاطر الطريق وطول المشوار.

فالمدارس المجتمعية بتوفرلهم مكان سهل وقريب من البيت.. وبتوفر بيئة مناسبة للتعليم، وغير كده كمان.. طريقة التعليم نفسها مختلفة في فصل مدرسة التعليم المجتمعي، وبيتم تدريب المدرسين بحيث يكونوا مؤهلين للتعامل مع الأطفال وتربيتهم بشكل سليم قبل تعليمهم.. فالطالب بيقدر يشارك بنفسه ويتعلم مهارات مختلفة وهوه بيتعلم المنهج في نفس الوقت وبياخد الشهادة الي بتؤهله للمرحلة الجاية من التعليم.


موقع مصر الخير غير مسؤل عن محتوى التعليقات

إشتراك في النشرة الإخبارية