مع بداية سنة 2017، وبعد ما حققنا بفضلكوا إنجازات كتير في 2016.. بنفتكر معاكو حملات كتير نجحت خلال السنة دي واللي السبب في نجاحها كان أنتو.. بمشاركاتكوا بالمساعدة بالمجهود، وبالتبرعات، وبنشر الفكرة بين الناس، وباللايك والشير على فيسبوك وتويتر لنشر أفكار الحملات والتوعية بيها.. وكل طرق الدعم اللي فتحت باب خير لناس كتير.
في 2016 قدرنا نوصّل لـ 5 مليون مستحق من أهالينا في جميع محافظات مصر.. وبمساعدتكو إن شاء الله هنحقق هدف السنة دي ونوصل خدماتنا لـ 6 مليون من الأكثر استحقاقاً في سنة 2017.

1بداية من رمضان اللي فات كان هدفنا نوصل لـ 3 مليون صائم.. كان هدفنا نوصل للناس في القرى والناس اللي على سفر عن طريق الوجبات والخيم الرمضانية، وقدرنا نكون سبب في خروج 2000 غارم وغارمة عشان يرجعوا لأهلهم قبل العيد. وفي العيد الكبير في حملة صك الأضحية السنة دي، كان فيه أكتر من 2000 أسرة مصرية مستحقة وصلها نصيبها من الأضاحي.
ومع السيول اللي كانت في أوائل الشتا السنة دي في راس غارب كانت مساهماتكو اللي خلتنا من أول الناس اللي قدمت الإغاثة والمساعدات الإنسانية، وبعدها في حملة الشتا اللي بدأناها ولسه مكملين بنساهم في توزيع البطاطين وكراتين المواد الغذائية الأساسية لمعظم محافظات مصر.. وهدفنا نوصل لمليون ونص مستحق من أهالينا.

 

وحملة دعم المدارس المجتمعية كان ليها نصيب كبير ومشاركة قوية جداً خاصةً على فيسبوك، لأن كل لايك وشير كانت بتمثل دعم لفكرة المدارس المجتمعية عشان تكمل في سنتها الخامسة معانا ونقدر نوصل لـ 1000 مدرسة مجتمعية في أكتر من محافظة.. منهم 26 مدرسة مجتمعية جديدة السنة دي في محافظة مطروح.
شكراً لكل اللي ساهم في وصول الخير ده على إيدينا للناس اللي تستحقه.. وشكراً لكل اللي هيساهم نكمل مشوارنا اللي بدأناه، وإن شاء الله مع السنة الجاية نقدر نحقق أضعاف أضعاف اللي بنتمناه بدعمكم وتطوعكم لعمل الخير.


موقع مصر الخير غير مسؤل عن محتوى التعليقات

إشتراك في النشرة الإخبارية